Hamingjuóskir frá náttúruverndarsinnum

Síðan þessi heimasíða var opnuð hef ég séð hvað náttúruverndarsinnar eru víða. Það rignir yfir síðuna samstöðu og hamingjuóskum allsstaðar frá, frá einstaklingum og samtökum og Íslendingum búsettum erlendis. Við þökkum innilega fyrir allan þennan stuðning.
Takk öll!

Og okkur er bent á fjölda greina. Það er víða skrifað um náttúruvernd. Í grein eftir Guðberg Bergsson (úr DV 26/8/08) fann ég þessa málsgrein:

“Flestar þjóðir eiga merki um afrek og glæsta fortíð í höllum og kirkjum auk bókmennta og lista. Allt var þetta unnið í margvíslegum stíl eftir tíðarandanum: Þannig er menning og erfðir fléttað í heild fyrir tilstilli tungunnar og minnismerkin hefur fólk fyrir augunum alla daga. Við eigum næstum ekkert nema sögurnar sem enginn les lengur. Hér er ekki heldur fyrir að fara staðföstum leiðtogum sem hægt er að hafa öðrum til eftirbreytni.”

Í sömu grein bendir Guðbergur réttilega á það, sem stórframhvæmdasinnar hafa haldið á lofti, að heimamenn styðji orkuöflun, hvað sem hún kostar. Ég veit að það gerir hluti heimamanna, en fólk er líka blekkt. Ég meina að fólk er blekkt með setningum eins og til dæmis þessari ”Fljótið verður aldrei virkjað,” þó búið sé að stofna félag um virkjun þess og staðsetja “mögulega virkjunarkosti". Mér dettur bara í hug það sem Laxness lét ráðherrann segja í Atomstöðinni. ”Landið verður ekki selt.”

Blekkingar finnast mér alltaf óheiðarlegar en örvæntingin er mér samt óskiljanleg. Við erum ekki á flæðiskeri stödd. Hér er ekki atvinnuleysi, en það er fólksfækkun. En það “að reiða öxi að rótum náttúrunnar” tel ég ekki ráðið við henni.

Guðbergur segir líka:

”Slík athafnaörvænting getur aðeins þrifist hjá þjóð sem heimtar frelsi til að slíta sig úr tengslum við sína einu fótfestu frá upphafi vega: dulmagn náttúrunnar. En ef það deyr deyjunm við sem þjóð. Svo einfalt er það.”

Ég er hrædd um að það sé mikið til í orðum Guðbergs og vil ekki að við deyjum sem þjóð, en ég vil vera bjartsýn. VIÐ eigum nefnilega landið og það er og verður sú fótfesta sem við byggjum á, búsetuna, menninguna, hamingjuna og stoltið.

Hólmfríður Bjartmarsdóttir

Ef menn vilja lesa grein Guðbergs í heild sinni er hana enn að finna á heimasíu Saving Iceland og þar er einnig að finna dæmi um skrif úr þessari "örvæntingarfullu baráttu gegn fólksfækkun á landsbyggðinni" (haft eftir Sig. Ben) sem Guðbergur kallar “atvinnuörvæntinu.”

Til baka á forsíðu