Aðalskipulag Þingeyjarsveitar
Í vetur kynnti sveitarstjórn Þingeyjarsveitar
tillögu að aðalskipulagi þar sem fram kom að
rædd hefði verið í nefndinni hugmynd að
friðun Skjálfandafljóts og umhverfis þess
sunnan Aldeyjarfoss og Hrafnabjargafossa, en ekkert ákveðið.
Á aðalfundi sveitarstjórnar fyrr í haust
kom fram að borist hefðu athugasemdir varðandi friðun
"alls vatnasviðs" fljótsins sem er orðalag
okkar í markmiðum hópsinsog birt er hér
á síðunni. Í athugasemdunum er bent á
að neðan fossanna, í byggð, séu fjöldi
áa og lækja sem í fljótið renna og
bændur nýta nú sem heimavirkjanir og vilji gera
áfram.
Fyrirspurn
Í tilefni af þessum fréttum ræddi hópurinn
hvort breyta ætti orðalagi í markmiði okkar
(það er orðunum "allt vatnasvið") en
ákvað fyrst að spyrjast fyrir um hlutafélagið
Hrafnabjargavirkjun hf sem Þingeyjarsveit á hlut í.
Sendi hópurinn fyrirspurn til skipulagsnefndar og sveitarstjóra
um það hvort hlutafélagið Hrafnabjargavirkjun
hefði enn uppi áform um að virkja Skjálfandafljót,
og ef ekki, hvert væri þá markmið þess
félags nú.
Eftirfarandi er svarið sem okkur barst frá sveitarstjóra
Þingeyjarsveitar.
| |
Svarbréf sveitarstjóra:
Hutafélagið Hrafnabjargarvirkjun
hf. var stofnað til þess að virkja í
Skjálfandafljóti. Þingeyjarsveit á
lítinn hlut í því félagi.
Á hluthafa- og aðalfundi félagsins fyrir
skömmu lét ég koma fram að unnið
væri að aðalskipulagi fyrir Þingeyjarsveit
og ég teldi að það væri ríkur
vilji fyrir því að ekki yrði virkjað
í fljótinu og það friðað með
einhverjum hætti. Einnig eru upp hugmyndir um jarðfræðitengda
ferðaþjónustu á svæðinu
og fer það væntanlega illa saman við virkjun.
Niðurstaða fundarins var að halda félaginu
enn gangandi en þeir sem að því koma
vita að öll áform um virkjanir gætu
hæglega verið slegin út af borðinu við
gerð aðalskipulagsins. Gert er ráð fyrir
Hrafnabjargarvirkjun í skipulagi hálendisins
en ef Þingeyjarsveit kemst að annarri niðurstöðu
gildir það. Það er hins vegar endanlega
á valdi skipulagsnefndar og sveitarstjórnar
hvort vilji sé til þess að hafa umræddan
virkjunarkost inni á aðalskipulagi. Ég hef
það á tilfinningunni að slíku
verði hafnað. Ekki veit ég hvernig málið
stendur gagnvart þeirri nefnd sem átti að
vega og meta virkjunarkosti á Íslandi. Vonandi
verður fljótlega hægt að kynna fyrstu
drög að aðalskipulagi og þá kemur
í ljós hvort sveitarfélagið verður
með umræddan virkjunarkost inni eða ekki. Við
verðum því að bíða og sjá. |
|
|
